2026 оны 05 дугаар сарын 12-ны өдөр Шинжлэх Ухаан Технологийн Их Сургуулийн Эрчим хүчний инженерчлэлийн сургууль болон “Цэцэнс Майнинг энд Энержи” ХХК хамтын ажиллагааны санамж бичигт гарын үсэг зурлаа.

Санамж бичгийн зорилго нь эрчим хүчний салбарын боловсон хүчин бэлтгэх, сургалт, судалгааны ажлыг хөгжүүлэх, онол болон үйлдвэрлэлийн уялдааг бэхжүүлэхэд чиглэгдэж байна.

Хамтын ажиллагааны хүрээнд дараах үйл ажиллагааг хэрэгжүүлэхээр тусгав:

• Эрчим хүчний чиглэлээр суралцаж буй оюутнуудыг үйлдвэрлэлийн орчинд дадлагажуулах;
• Төгсөгчдийг ажлын байраар дэмжих, сонгон шалгаруулалт зохион байгуулах;
• Инженер техникийн мэргэжилтнүүдийг лекц, семинар, сургалтад оролцуулах;
• Судалгаа, инновацын хамтарсан төсөл хэрэгжүүлэх;
• Лабораторийн нөөц, тоног төхөөрөмжийг харилцан ашиглах;
• Багш, оюутнуудын судалгааны ажлыг дэмжих;
• Салбарын бодлого тодорхойлогчдод дэвшилтэт шинэлэг санаа, инновацыг танилцуулах.

   “Цэцэнс Майнинг энд Энержи” ХХК нь Бөөрөлжүүт цахилгаан станцын төслийг хэрэгжүүлэгч бөгөөд энэхүү хамтын ажиллагааг эрчим хүчний салбарын хүний нөөцийг чадавхжуулах, шинжлэх ухаан болон үйлдвэрлэлийн хамтын ажиллагааг өргөжүүлэх чухал алхам хэмээн үзэж, чадварлаг инженерүүдийг бэлтгэх, залуу мэргэжилтнүүдийг дэмжих чиглэлээр цаашид идэвхтэй хамтран ажиллахаа илэрхийлэв.

Энэхүү санамж бичиг нь эрчим хүчний салбарын боловсрол, судалгаа, үйлдвэрлэлийн интеграцийг бэхжүүлэх бодит хувь нэмэр болох юм.

ШУТИС-ийн Эрчим хүчний инженерчлэлийн сургууль

2026.05.12